நிழல் உலகம்

அது ஒரு நிஜங்கள்
பொய்யாய் போன நிழல்களின் உலகம்!

வெள்ளை வெளிச்சத்திற்கு நடுவே
ஓவியமாய் நடமாடும் நிழல்கள்!
சில மிருக நிழல் மனிதன் போல!
பல மனித நிழல் மிருகம் போல!

அங்கு
பச்சை மஞ்சள் சிகப்பு
எல்லாம் கருப்பாக
வண்ண வேற்றுமை இல்லை!

நிழல்கள் பேசுவதில்லை
நடமாடுகிறது! நடனமாடுகிறது!
மொழி வேற்றுமை இல்லை!

நிழல் காட்டும் வேற்றுமை ஒன்று தான்
ஆண் பால்! பெண் பால்!
திருநங்கையை
பெண்பாலாய் காட்டிய நிழல்
நிஜத்தை வெல்கிறது!

நிழல் உலகம் அது நிஜ உலகம்!
அங்கு
பிச்சைகாரன் நிழல்
அட்சய பாத்திரம் ஏந்துது!
பிச்சை போடுபவன் நிழல்
அதை யாசிக்கிறது!

பணம் எரிந்த சாம்பலாக!
வைரம் மீண்டும் நிலக்கரியாக!

பாபர் ராமர்
நிழல்களில் வேற்றுமையில்லை!
கண்டி முருகன் நிழலை
புத்தர் நிழல் மறைக்கவில்லை!

நிழல்கள் தொப்புள்கள் காட்டுவதில்லை!
தொடைகள் தெரிய ஜீன்ஸ் அணிவதில்லை!
காதல் கொள்ளும் அவைகளுக்கு தேக பசியில்லை!

பொய் பொறாமை கோபம் துரோகம் வெறுப்பு வஞ்சனை
இவைகளை அது அறியவில்லை!
நிழல் சிரிக்கிறது நட்பு பழகுது பகல் முழுவதும் உழைக்கிறது
இரவில் உலகமே நிழலாகிறது!

அங்கு என் நிழல் மட்டும்
அங்கும் இங்கும் அலைகிறது!
நிழல்களை தேடி ஓடுகிறது!
எல்லா நிழல்களிலும் தேடுகிறது!
உன் வண்ணத்தை!